| ГЛАВНАЯ |
| НОВОСТИ |
| БОГОСЛУЖЕНИЕ |
| О ПРИХОДЕ |
| ПРАВЯЩИЙ АРХИЕРЕЙ |
| ГАЛЕРЕЯ |
|
|
КАНОН СВЯЩЕННОМУЧЕНИКУ И ИСПОВЕДНИКУ ПАВЛУ,ЕПИСКОПУ КОЛОМЕНСКОМУ
(память его 3 апреля)
Тропарь, глас 8. Епископе Павле исповедниче, святителю коломенскии, обличивыи прелесть, избиенныи Никоном неистовым, обидимым крепкая еси надежда, ты избави и спаси нас, твою светлую память празднующих верно (дважды).
Слава, и ныне. Богородичен. Иже нас ради рождеися от Девы, и распятие претерпев Благии, Испровергии смертию смерть и Воскресение явль яко Бог, не презри ихже созда рукою Своею, яви человеколюбие Свое, Милостиве, приими рождьшую Тя Богородицу, молящуюся за ны, и спаси Спасе наш люди согрешшыя.
Канон, глас 2.
Песнь 1, ирмос. Во глубине потопи древле фараонитская вся воиньства, преоружену силу воплощьшееся Слово преспеющия грехи потребило есть, преславныи Господь, яко прославися.
Запев: Святыи священномучениче и исповедниче Павле, моли Бога о нас (поклон).
Укрепи Христе ума моего силу и даждь ми слово мудрости божественныя яко да воспою святителя Павла, Твоего приснаго служителя и угодника.
Запев. Ревнуя о Церкви Божии, на соборище дерзнул еси обличити коварства отступник, иже изгнаша тя в заточение, поюща Господеви, яко прославися.
Слава. В день воньже Христос соверши безкровную жертву, в Четверток Великии, ты исповедниче, сожжен был еси, яко жертва богоприятная.
И ныне. Богородичен. Херувим и серафим явися славнейши, присно Дево, рождьши Бога Слова паче ума и слова, тем Тя вси вернии ублажаем.
Катавасия: Избави от бед рабы своя, святыи священномучениче и исповедниче Павле, яко вси по Бозе к тебе прибегаем, ты бо молиши о нас Христа Бога нашего (поклон). Господи помилуй (трижды, с поклонами).
Песнь 3, ирмос. Процвела есть пустыня яко крин, Господи, язычная неплодящая, Церкви пришествием Ти, о ней же утвердися мое сердце.
Запев. Святительства саном украшен, богоугодне пожив, и законне пострадав, явился еси необоримое ограждение Церкви, о ней же утвердися мое сердце.
Запев. Божественное Евангелие соблюдая, не убоялся еси убивающих тело, и по кончине огненней взыде на небеса сликовствовати со святыми.
Слава. Благими нравы светяся, исполнился еси премудрости и силы духовныя, и сияеши славою мучении своих, за нихже приял еси стократное воздаяние.
И ныне. Богородичен. Господь воцарися над языки в плоть облекся от Тебе Пречистая, спасе их от работы вражия, и просвети премудростию евангельскою. Катавасия.
Седален, глас 7. Светлую память твою празднующе, пречудныи святителю Христов Павле, молим тя, яко великаго заступника и утешителя, испроси у Христа Бога Церкви единомышления, и нам християном спасение, и велию милость.
Слава, и ныне. Богородичен. Не отлучься недр Бога Отца, непостижимо воплотися от Тебе предвечныи Сын Божии на спасение мира, и Девою сохрани Тя и по Рожестве, Богородице Марие, Его же моли сохранити от стрел греховных и спасти верою Тя славящих.
Песнь 4, ирмос. Пришествовав от Девы, ни ходатай, ни ангел, но Ты Сам Господи воплощься и спасе всего мя человека, тем вопию Ти, слава силе Твоей.
Запев. Единство Троицы проповедал еси, Ей же служаше верою и любовию, священномучениче, и ныне молися умирити смущения мирския, и спасти поющих тя.
Запев. Память ти, яко праведнику с похвалами подобает, ты бо праведне пожив от неправеднаго умерщвен, сподобился еси воздаяния от праведнаго Судии.
Слава. Илии ревнителю уподобился еси святителю, обличая заблуждение, и уча не отступати от правыя веры Христовы, ея же ничтоже нужнейши есть.
И ныне. Богородичен. Гору несекомую Богородице, провиде Тя Даниил, от Тебе бо отсечеся не рукама человеческима Камень Христос, Иже сокруши бесовскую лесть, и исполни землю истиною Боговедения. Катавасия.
Песнь 5, ирмос. Ходатай Богу и человеком бысть Христе Боже, Тобою бо Владыко к Светоначальнику Отцу Ти от нощи неведения приведение обретохом.
Запев. Светлейши солнца возсия память твоя исповедниче, юже торжествующе, прославяем подвиги твоя, просяще от Христа прияти тобою грехов оставление.
Запев. Кто не удивится твоему смирению и мужеству славне, яко на соборе един дерзнул еси обличити злокозненное умышление, не страшася мук и смерти.
Слава. Очистил еси душу свою воздержанием, молитвою и благодатию, очисти наша душа от греховных страстей и всяких соблазн молитвами си, священномучениче.
И ныне. Богородичен. Тя едину Богородицу исповедаем, едина бо Ты родила еси единаго Христа Бога, ему же молися о всех с верою и любовию призывающих Тя. Катавасия.
Песнь 6, ирмос. В бездне греховней одержим, неизследную милосердия Твоего призываю бездну, от тли Боже мя возведи.
Запев. Претерпел еси горькое заточение, беззаконно лишен престола святительскаго, но сподобися предстояния престолу славы Божия со святители и мученики.
Запев. Апостольски последовал еси Христу, исповедав Его Евангельское учение пред мучителем, не бояся уз, ни темницы, ни смерти святителю Павле.
Слава. Истинному пастырю Христу подобяся, положил еси душу свою за овцы своя, делы и словесы утвердив их не исходити с пажити благочестия.
И ныне. Богородичен. Вси земнороднии да веселятся Пречистая, и да воспевают Тя верных собори, яко родила еси Христа Спаса, Избавителя душам нашим. Катавасия.
Слава, и ныне. Кондак, глас 3. Яко звезда северная, неподвижно сияеши на тверди церковней, являя правило веры, ея же ради пострадал еси, священномучениче Павле, тем Христос дарова тя Церкви Своей наставника и учителя, и всем верным похвалу и утвержение.
Икос. Присносущнаго и немерцаемаго света Христа зрети желая присно, кротко претерпел еси яко агнец мучение от духовнаго волка, облеченнаго пастырскою одеждею, иже не терпя твоея ревности о вере святей, терзаше тя и сорва с тебе мантию святую, изгна тя в заточение, идеже мученически скончался еси святителю, сего ради любовию почитаем тя, яко церковнаго учителя, и всем верным похвалу и утвержение.
Уставщик возглашает: Прокимен, псалом Давыдов. Честна пред Господем смерть преподобных Его.
Певцы поют прокимен весь.
Уставщик стих: Что воздам Господеви о всех их же воздаст ми.
Певцы такожде весь прокимен.
Посем уставщик - прокимен до полу, а певцы поют вторую половину прокимна.
Уставщик: Господи Исусе Христе, Сыне Божии, помилуй нас.
Певцы: Аминь.
Уставщик: Всяко дыхание да хвалит Господа.
Певцы это повторяют пением.
Уставщик стих: Хвалите Бога во святых Его, хвалите Его во утвержении сил Его.
Певцы: Всяко дыхание да хвалит Господа(пением).
Уставщик: Всяко дыхание.
Певцы: Да хвалит Господа.
Посем певцы возвышенным гласом: Господи помилуй (трижды).
Уставщик: От Иоанна святаго Евангелия чтение. Певцы: Слава Тебе Господи (поклон).
И, оградившись крестным знамением, слушаем со вниманием благовестие. Евангелие от Иоанна, зач. 35 (от полу).
Рече Господь ко пришедшим к нему июдеом. Аминь аминь глаголю вам, не входяи дверьми во двор овчии, но прелазя инуде, той тать есть и разбойник. А входяи дверьми, пастырь есть овцам. Сему дверник отверзает, и овца глас его слышат. И своя овца глашает по имени, и изгонит их. И егда своя овца ижденет, пред ними ходит, и овца по нем идут, яко ведят глас его. По чюжем же нейдут, но бежат от него, яко не знают чюжаго гласа. Сию притчю рече им Исус, они же не разумеша, что бяше яже глаголаше им; рече же паки им Исус, аминь аминь глаголю вам, яко Аз есмь Дверь овцам. Вси елико их прииде прежде Мене, татие суть и разбойницы, но не послушаша их овца. Аз есмь Дверь, Мною аще кто внидет, спасется, и внидет, и изыдет, и пажить обрящет.
Певцы: Слава Тебе Господи (поклон).
И далее, пением: Слава Отцу и Сыну и Святому Духу. Отче, Слове и Душе, Троице Святая очисти множество согрешении наших. И ныне и присно, и во веки веком, аминь. Молитв ради Богородицы, Милостиве, очисти, множество согрешении наших. Помилуй мя Боже, по велицей милости Твоей, по многим щедротам Твоим, очисти беззакония моя, Боже Спасе мой.
Стихера, глас 6. Великая вера и любовь к Богу, ею же исполнен был еси, священномучениче Павле, и дерзновение пред сопротивными, показа тя твердое основание Церкви Христовы, в ней же торжествующе достодолжно ублажаем тя, и умильно взываем ти: моли о нас единаго Человеколюбца Бога.
Песнь 7, ирмос. Богопротивно веление беззаконнующа мучителя высок пламень вознесло есть, Христос же простер богочестивым детем хлад духовныи, Сыи благословен и препрославлен.
Запев. Не устраши тебе прещение муками и смертию, дерзновенно сопротивляющагося искажению предании апостольских, и поюща Богови, Сыи благословен и препрославлен.
Запев. Незыблем столп Церкви показася, ни биение бо, ни раны, ни смерть не возмогоша поколебати тя, взывающа Христови, Сыи благословен и препрославлен.
Слава. Оружие обоюду остро врагом Божиим показа тя ревность твоя священномучениче, ихже ты поразил еси не силою вещественною, но силою Христа Бога, благословенна суща и препрославлена.
И ныне. Богородичен. Низложивыи гордыя, и вознесыи смиренныя Христе, укроти нападающих на ны враг наших, и спаси душа наша молитвами рождьшия Тя. Катавасия.
Песнь 8, ирмос. Пещь огненна иногда в Вавилоне действо разделяше, Божиим велением халдеи опаляющи, верныя же прохлаждающи поюща, благословите вся дела Господня Господа.
Запев. Каплюща на землю кровь твоя бысть семенем духовным, от него же израстоша мученик соньмы, и верных множества, иереов и святитель ликостояния поющих, благословите вся дела Господня Господа.
Запев. Елико вернии, приидите поклонимся Христу (поклон) благодаряще, яко такова заступника и молитвенника яви в последняя дни, Павла священномученика, поюще, благословите вся дела Господня Господа.
Слава. Нам чтущим тя любовию святителю, даруй оставление грехов молитвами си ко Святей Троице, Юже славим во единем существе поюще, благословите вся дела Господня Господа.
И ныне. Богородичен. Имуще Тя Заступницу и Помощницу всесильну, Богородице, молимтися, избави ны от всех злых обстояний, поющих, благословите вся дела Господня Господа. Катавасия.
Песнь 9, ирмос. Безначальна Родителя Сын Бог и Господь, воплощься от Девицы нам явися, омраченныя просветити и собрати расточенныя, тем всехвальную Богородицу величаем.
Запев (поклон). Тезоименит сыи верховному апостолу, подражал еси ему и твердою верою и страдании за слово Божие, с ним же и о нас молися.
Запев. Изгнавыи тя неправедне с престола святительскаго, бежа с престола своего, никимже гоним, токмо Божиим изволением, и праведно лишен бысть сана и чести, тебе же прослави Господь яко священномученика.
Слава. Явися великии молитвенник о нас грешных, препроводивыи житие, яко святитель истинен, и скончавыися, яко мученик и исповедник, и ныне торжествует со святыми.
И ныне. Богородичен. Всех премирных ангельских сил превышши еси, яко рождьшая Сына от Бога Отца, прежде денницы возсиявшаго, Ему же поклоняющеся (поклон), Тя прехвальную Богородицу величаем. Катавасия.
Задостойник: Владычице, приими молитву раб Своих и избави нас от всякия нужды и печали. Ты еси Богородице, Оружие наше и Стена, Ты еси Заступнице, и к Тебе прибегаем, Тя и ныне на молитву призываем, да избавиши ны от враг наших. Возвеличим Тя вси Пренепорочную Матерь Христа Бога нашего, Юже осени Дух Пресвятыи (поклон до земли).
Трисвятое, и по Отче наш, Исусова молитва. Тропарь священномученику (Епископе Павле...), Слава, кондак ему (Яко звезда...), и ныне. Богородичен (Иже нас ради...). Господи помилуй (40 раз, с тремя поклонами в начале). Слава, и ныне. Честнейшую херувим... (по-клон). Слава (поклон), и ныне (поклон). Господи помилуй (дважды), Господи благослови (поклон).
Отпуст. Господи Исусе Христе, Сыне Божии, молитв ради Пречистыя Ти Матере и святаго священномученика и исповедника Павла, епископа Коломенскаго, и всех святых, помилуй и спаси нас, яко Благ и Человеколюбец. Аминь. Господи помилуй (трижды), и исходные поклоны.
Написать письмо автору проекта
